211: 人生第二支香水

去旅行除咗令人在當地吃喝玩樂買外，番到香港都仲可以繼續，事關我又中咗機場香水的迷陣！

今次事發在新加坡，因為去程差d上唔到機，所以各devils皆十分緊張，預早咗三個鐘有多就去到機場，去到人地都未開counter辦登機手續，於是一行四人便推着行李車逛逛逛，食斑蘭葉蛋糕嘆咖啡，有個devil仲話由這個旅行起愛上飲咖啡，哈哈！

Hea完counter開了，便快趣寄哂行李入去候機範圍。大家都知裡面一定有好多舖頭，又逛逛逛，行過香水陣，又試試試，我已經好克制試咗只係幾款，但大鑊，有一隻好特別好清香好男人味，中招！

跟第一次同樣的再在返到香港後發生，不過這款已確定係男裝，去了莎莎，有，試，一樣！但比原價只得九折，再睇其他地方都係一樣價錢，把心一橫，到該牌子專門店睇，去了半島那間，因為少些自由行，價錢跟莎莎原價一樣，樽差唔多，莎莎那水是透明，這裡的水是淺黃，味道有些分別但更合心，心想唔要那九折就買到正貨，值，買！

Sales姐姐好好招呼，我行去睇袋睇呔都好詳盡講解，但我費事買禁多嘢，買完俾完錢便滿足地離去！

買完後發現除了水色不同，外面包裝紙盒也不同，莎莎白色，正貨白黑紫，原來連香水個名都唔同！我係根本買咗第二隻香水，根本唔係在新加坡噴那隻！

不過，這款的確好些。返到屋企上網睇，真係是兩款不同的，新加坡跟莎莎那款是男人啱啱洗澡完畢的香味，我買那款是晚間清香。哈哈，原來於新加坡試時那特別的味是沐浴露味！諗番真係有九成似！

這次錯有錯着而獲更好的，要記住：2011年9月14日18：05。