198：被跟蹤

費解。

前幾天返工搭地鐵，大約到旺角站後不久，有一位穿紫色尼龍褸的女子，四十餘歲，輕輕捉着我的左邊手臂，微笑着，「你點呀？你還好嗎？」「咩事呢？」「冇嘢，你點呀你？」她一路也是保持微笑輕聲說話。「你係咪認錯人呢？」「冇，我冇認錯人呀」

那刻覺得好奇怪，不知道如何回應，於是便低頭玩電話，偷望着她有沒有其他動靜，話哂係陌生人都要小心點。

我唔想理佢繼續低頭，佢就一路望住我，我忍不住便在佐敦站下了車，她見住我要下車此刻並沒有反應，但我下車在月台行前時，見到佢跟住我，好驚，即是佢冇反應係扮嘢，其實已經唸住跟我落車跟住我。我趁原本的列車還未開出，走返入前幾卡的車廂。

心唸應該撇甩咗佢，安心了。到金鐘下車時，佢又出現！佢應該見我入返去佢又入返去，跟住睇吓我喺邊卡，恐怖！

同樣地，我落車佢冇反應，我望返去後面又見到佢跟住嚟，於是極速奔跑，出閘，飛返去公司。

事後有很多設想，佢係咪有病？佢係咪曾經有個仔好似我？

沒可能想到的，只好以後多點留意身邊的人。