其實想寫楊千嬅都想咗一排, 不過唔用中文寫個感覺一定好怪, 所以打得慢一點都要寫.
聽完呢張碟, 覺得千嬅既高音都不過不失, 算唱得好好架啦, 尤其係"一葉舟"這首歌, 唱得比以前自然, 亦好有感情, 林夕既詞更加係首歌既意境靈魂所在, "誰能甚麼也有, 又怕太早想通想透, 連抱擁都形同木偶"這句充分反映咗人某程度上唔好去不息地強求某些事物, 而可以好似一葉舟, 沿河隨風向心中的大海堅強地載沉, 又再浮, 前往.
不過如果你叫千嬅跳勁舞唱快歌, 都應該會係得啖笑.
鍾愛千嬅主要唔係因為佢既歌, 唔係佢做戲好笑, 亦都唔係佢夠喪, 而係佢份人既感覺好真, 好實在, 談吐可以好無厘頭亦可以好大體, 最鍾意佢係叱吒頒獎禮講得獎感受, 可能有部份係預先準備既台詞, 但係成個過程好揮灑自如, 有些位好觸動到觀眾, 佢呢樣嘢好值得黑貓借鏡.
以下係部份黑貓記得千嬅既說話:
- 人嬴係嬴自己, 輸都係輸自己
- 喜愛, 係冇得要求既, 只可以嘗試爭取, 但係最大既滿足感係盡情投入, 讓人們喜愛自己
- 嬴, 真係好難, 嬴到, 真係值得開心, 但係, 真係既贏, 係要輸得起.
共勉之~
No comments:
Post a Comment