187: 電腦"奇才"

好多認識我的人都知我係電腦"奇才", 買一樣或者裝一樣電腦嘢往往需要比別人多一定的時間.

例如今趟買咗個Wireless Router, 研究咗半日再買埋條LAN線先裝到, 講出嚟都笑死人, 不過成功裝到咪得, 好似做audit一樣, 交到貨咪得, 只要唔係用咗比平常多出好多的時間, 同唔係交咗一pat屎出嚟就可以了.

成功裝咗, 唔使同細佬爭上網, 自己又學識多一樣嘢, 又可以消磨到要放無薪假的時間, 一舉幾得, 正!

186: 兼顧

我可以在一範疇內兼顧幾樣事物, 但我唔可以兼顧幾個範疇.

簡單說, 在工作這一範疇內, 我可以兼顧數個同時進行的項目, 但當我好專注於工作時, 我唔可以分神於投資, 愛情, 遊玩等. 應該話, 其實都可以去投資, 愛情, 遊玩, 不過唔會做得好滿意.

譬如當我同朋友講, 我對一個人有了好感, 佢地會為我高興, 但過一段時間佢地問我點呀同那個人點呀, 我會答都係敢, 因為係其間往往會有其他東西攪緊, 比如工作好多時間心機要花, 或者呢排成日去睇樓, 那我就沒有時間和心情去諗吓同那個人怎樣. 朋友可能會覺得我敷衍他們或覺得我有所隱瞞, 但我真係冇.

如果俾人誤會, 我係會好怒, 因為我不喜歡我明明應該係A但被認定不是A的感覺, 不過同時, 我都會檢討自己, 是否自己的行為給了人你不是A的印象.

時間唔會等人, 所以我諗我都錯過咗幾多機會, 要狠一點去取捨了.

185: 資產保養

資產保養, 這裡指的並不是公司資產和會計處理方法那些方面.

每個人都有自己嘅資產, 可以係好多嘢, 只要係屬於你的和你擁有的, 都係你嘅資產, 例如家庭, 健康, 人際關係, 性格, 容貌等等.

保養自己嘅資產, 可以指去確認, 理解, 提升, 轉化, 保護, 維持他們的美.

心慈則貌美, 我認為不只是指內心美跟外在美的關係. 心美, 方可認清跟領會事物的美.

184: 興記茶餐廳

今日係放無薪假嘅第一日, 之前好多人都問我放一個禮拜假有咩做, 其實真係冇乜大計, 只係想做些平時冇時間做嘅事.

下晝於牛頭角剪頭髮, 之後去咗興記茶餐廳食嘢, 興記茶餐廳係之前有一期忽然一週介紹過, 依間興記茶餐廳位於牛頭角下邨, 好耐歷史, 因為牛頭角下邨即將清拆, 近來有好多人去嗰度拍照, 記錄低一些集體回憶. 那期忽然一週就係介紹牛頭角下邨一些值得大家懷念嘅事物, 興記茶餐廳就係其中一項. 興記茶餐廳好易搵, 位置在淘大商場對面間小學正後面, 入到去裡面, 有街坊, 有像我一樣特別去的人, 叫咗生炸雞脾+凍檸茶($18)+豬扒多士($10).

豬扒多士先來, 豬扒鬆軟到像雞扒, 醃得好夠味, 多士又夠脆, 好味道!

食完, 嚟埋生炸雞脾, 顧名思義, 生炸雞脾係將隻雞脾由生炸到熟, 唔係好似有些是用其他方法整熟隻雞脾再攞去炸. 一咬落去, 隻雞脾塊皮超脆, 脆到好似食薯片, 正! 醃得好夠味, 唔鹹, 口感味覺皆好!

可能因為佢地已經做了好多十年生意, 好清楚食客鍾意乜味道, 所以做出嚟嘅食物都好有水準.

我食食吓嘅時候, 有個男人搭枱, 坐我對面, 同原本同我坐同一張枱嘅男人傾起上嚟, 佢同佢傾傾吓仲望向我, 同我一齊傾, 於是我就加入咗佢哋嘅對話, 傾吓豬流感, 佢仲問我, 我又叫豬多又叫炸脾, 做乜唔叫兩個下午茶餐, 抵D喎, 我話我飲唔曬兩杯飲品啊!

食物好食不在話下, 人又親切, 可以再去, 因為仲有好多嘢都好似好好食! 哈哈!!

183: 洗牙

點解洗牙? 其實已經有好多年冇洗, 好唔乾淨.

個牙醫係細佬箍牙那個, 我老豆話, 個牙醫幾好, 好多客, 至拿手係種牙, 我同埋細佬去會有折, 牙醫都會有折? 心想, 不過, 一齊去都冇壞.

去到, 剛巧有個客俾緊錢, 姑娘同佢解釋緊張單點計, 我聽到洗牙要$300.

入去見醫生, 佢問我幾耐冇洗過牙, "都有好多年了......", "敢一陣會辛苦D啦!" (即係我會辛苦D).

"你都幾多牙石, 不過就冇蛀牙, 以後刷乾淨D應該冇問題", "好, 係呀, 我會了......"

過程中, 有幾下真係幾痛, 最痛係"姐"到牙齒與牙肉那個邊位, 同"姐"牙隙位置, 簡值係痺到痛!! 鬼叫自己棚牙唔乾淨, 抵架!! 死忍, 扮鎮定, 哈哈!!

牙醫手勢幾得, 將令個客痛嘅時間縮到最短, 好快就洗完, "你照下先", "好乾淨喎 (亦都好痛)"......

姑娘在洗之前鋪咗塊布在我心口, 但係D藥水(混有血絲)都濺到我件衫同埋眼鏡!!!!! 好彩我件衫係黑色, 如果唔係成身血就......哈!

出去俾錢, $200, 真係有折!!

182: Blog vs Facebook

寫blog都寫咗一段時間, 雖然唔係成日有新貼, 但自問全部都係用心想的.

而家非常流行Facebook, 點解唔喺Facebook寫Note呢?多好多人會睇到喎.

我覺得嗰個人如果睇我個blog, 佢係要特登click某d連結或者係佢bookmark咗我個blog而嚟睇, 即係要唸起呢個人, 佢先會去佢個blog, 佢係處於主動.

但Facebook就不同了, 你post個note, 好多人即刻可以喺news feed睇到, 好快好方便, 但嗰個人佢係處於被動.

基於性質上有分別, 我會選擇寫blog, 哈哈!!

181: "勁散熱王"

復活節假去咗九龍灣Megabox電腦展, 用$430買咗個250GB嘅外置硬碟, 送咗一些DVD-R同DVD-RW, 其實都冇概念這價錢係咪比出面便宜, 只是覺得OK及有需要就買.

買嚟做乜?之前部電腦無啦啦壞到機都開唔到, 乜文件, 相, 歌都冇曬, 好down, 所以一定要定期back-up, 如果唔係回憶會唔見好多, 而且無啦啦冇曬D重要嘢個感覺勁差勁無奈.

唔買唔知, 原來外置硬碟有好多牌子, 價錢亦可以差好遠, 依會場觀察所見, 日本牌價最貴, 韓國牌子夠便宜, 我那個牌子是imation, 之前用過佢嘅CD-R同USB手指到幾好, 同埋我那款賣點係"勁散熱王", 我唸都啱, 買膠外殼怕佢太熱會熔, 買薄金屬殼好型但唔襟跌, "勁散熱王"係比較厚金屬, 睇落硬淨襟跌, 屬於實幹型(哈哈~), 而且我係用嚟做back-up, 買個唔掂嘅返去等於冇買, 仲要又唔見曬D嘢, 絕對不可!!!

"勁散熱王"真係物如其名, 插咗部電腦幾個鐘連暖溫都冇, 掂!!!